حوار أحمد سالم
بين طموح الذهب الأولمبي، وسطوة الهيمنة المصرية على عرش الاسكواش العالمي، تخوض النجمة الواعدة “سنا إبراهيم” – المصنفة الـ 17 على العالم – رحلة شاقة مليئة بالتحديات والخطط المدروسة، في هذا الحوار الخاص، تفتح لنا قلبها وعقلها لتروي كواليس ما يدور داخل الملعب الزجاجي؛ من تفضيلها للحسم السريع، مروراً بصعوبة المنافسة المحلية والعالمية، وصولاً إلى الحلم الأكبر في أولمبياد لوس أنجلوس 2028.
سنا، يرى الجمهور متعة كبيرة في المباريات الماراثونية، لكن من وجهة نظر اللاعب داخل الملعب: هل تفضلين إنهاء المباراة بالفوز بنتيجة سريعة ونظيفة (3-0) توفيراً للجهد البدني، أم تستهويكِ متعة الفوز بـ “ريمونتادا” مثيرة بعد الخسارة بشوطين، لما تحمله من قوة ذهنية وتحدٍ خاص؟
رأي أي لاعب أو معظم اللعيبة إننا نكسب 3-0، حتى لو ماتش قوي، والـ 3-0 عندنا مش بتخلص بسهولة؛ أقل حاجة بنلعبها دلوقتى 40 دقيقة، ولو ماتش سهل 30 دقيقة، مفيش جو اللي نكسب في 20 دقيقة إلا قليل قوي لو حصل، فيبقى أسهل لينا إننا نكسب 3-0 ونلعب حلو، وتوفير جهد لجسمك ودماغك لأنك عندك تاني يوم ماتش أقوى من اللي قبله، فيدنا كلنا Top players وطبعًا الماتش اللي بتبقي خسران وكسبت بيبقي حلو، إنك عرفت إنك كسبت وخصوصا لو حد قوي وتصنيفه أعلى، فبتبقى حاجة حلوة، بس بفضل 3-0.
الإسكواش هي الرياضة الأكثر نجاحاً في تاريخ مصر الحديث؛ بوجود لاعبات كبار، كيف تصفين أجواء المنافسة بينكن كلاعبات مصريات؟ هل هي منافسة تضع ضغطاً إضافياً أم دافعاً للقمة؟
لاعيبة كبار مثل نور وهانيا، فيبقى الماتش بالنسبة لينا كمصريين صعب شوية؛ إحنا بنخبط في بعض، واحنا كتير وكلنا كويسين، واحنا في مصر أقوى ناس في الإسكواش، ومعظم المباريات بيبقى فيها شد لأننا بيبقي عايزين نكسب، فبنحاول نطلع إحنا الإثنين أحلى إسكواش، وبتبقى حاجة كويسة للبلد، بس ساعات بتبقى ضغط إننا كتير قوي وفي أولمبياد وبطولة إفريقيا، فالموضوع بيبقى صعب شوية.
في اللحظات الحرجة من المباراة عندما تكون النتيجة (10-10) في الشوط الفاصل، ما الذي تقولينه لنفسكِ داخل الملعب الزجاجي لتبقي في كامل تركيزك؟
بيبقى موضوع صعب كتير جداً كتفكير، وبيبقى على حسب إنت بتدر تقدر تفصل دماغك، وبقول لنفسي: “لسه واحدة واحدة، متستعجليش، دي نقطة طويلة”، وساعات الشخص بيستعجل ويضيعها هو، وخصوصاً في الوقت الحرج ده، إحنا الاثنين بنبقى متوترين، فيا طبعا اللي يقدر يمسك تفكيره أكتر ويقول إني لازم ألعب نقطة طويلة ومضيعش وأصبر وطبعا الواحد بيبقي خايف يضيع، فبنقول لنفسنا: “كنتي تعبانة، فهي كمان تعبانة؛ متستعجليش، ومتخافيش، وهاجمي ومش تستني إنها تضيع”.
هل هناك لاعبة معينة في الجولة العالمية تشعرين أن أسلوب لعبها يشكل تحدياً معقداً لكِ تحديداً، وتستمتعين بالتخطيط التكتيكي لمواجهتها؟
مش معقد، بس أنا مبحبش ألاعب شخصية دي؛ هو فيه كتير بس من الـ top players، مبحبش ألاعب أوليفيا ويفر لأنها رقم واحد في أمريكا وخامس على العالم، هي لعبها مش صعب على قد ما بتستنى إنك تغلط، فإنا بضايق إني ألاعبها إني مضيعش عشان مخخش في جيم بتاعها والدنيا تتلخبط، ولعبتها السنة اللي فاتت كذا مرة، واللي بيضايقني منها أنها بتبقى عايزة تقف في نص الملعب على طول، وأنا بحب أقف في نص الملعب، فيبقى مين اللي يفضل ماسك الملعب أكتر، فدي حاجة بتضايقنا إحنا الإثنين.
الجمهور يرى فيكِ وبجيلكِ الواعد امتداداً طبيعياً للهيمنة المصرية عالمياً، ما الذي تمتلكه الفتاة المصرية في الاسكواش ولا تمتلكه لاعبات العالم؟
الجمهور بيشوف الفرق إن إحنا لاعيبة مهارة، وإن لاعيبة مصر بتختلف عن الأجانب؛ معندهمش مهارات، وبنخلي اللاعب يروح في حتة وكورة في حتة، والأجانب لعبهم زي المكنة مفيش تغير، مش بيسعوا يخترعوا، وكل واحد في مصر مشهور بحاجة معينة ولعبة معينة، فده الفرق بين المصريين والأجانب.
الجميع يترقب أولمبياد لوس أنجلوس 2028، كيف تبدأ سنا إبراهيم التحضير من الآن لحلم الذهب الأولمبي؟
أولمبياد لوس أنجلوس حلم لكل مصرية عموماً، والموضوع مش سهل خالص إن واحد يلعبها؛ إحنا 10 من الـ top 20، ما بالك لو الـ top 50 بينافسوا على مكان أو مكانين، وهمَّا ياخدوا رقم واحد على مصر أو على العالم عموماً، والمكان تاني اللي يلعب بطولة إفريقيا واللي يكسبها، ده حلم ومركزة عليه أكثر في كل بطولة؛ لما أكسب فيه دهب بيساعدني في التصنيف يا أما تأهيل للبطولة الإفريقية أو للأولمبياد على طول، لإن إحنا كتير جداً ولسه منعرفش كام واحد يروح بطولة إفريقيا، ودائماً بفكر في الأولمبياد وفي نفس الوقت بركز في كل بطولة بلعب فيها كويس، ده بيساعدني خطوة للأولمبياد، وبإذن الله الواحد يتدرب كويس ويتعب وربنا معايا، والواحد ميعرفش من هنا للأولمبياد إيه اللي يحصل، فممكن كل حاجة تتغير في ساعة، وإن شاء الله خير.
